— 1184 —
Bermoela itoe pembesar hendak madjoeken barisannja menjerang ka sarangnja itoe perampok, tapi lantaran kwatir ada terdjadi laen penipoean dari fihak marika jang mengantjem tempat djaga'annja, maka Te Kong lantas tarik poelang barisannja dengen tiada berboeat apa-apa.
Ampir beroentoen dengen itoe warta kariboetan di Djin Ho Koan, djoega baginda Sin Tjong trima satoe soerat dari pembesar di Hang Tjioe, dalem mana ada di wartaken, Ya Loet Tong jang sekarang soeda kombali lagi ka negrinja telah bri pikiran pada Pak An Ong boeat berontak poela. Ini pikiran soeda ditrima baek, itoe radja di Pak Hoan telah prenta Taijtjoe Ya Loet Sioe San bersama bebrapa blas ponggawa prang, komendir seratoes riboe soldadoe soeda menjebrang di soengei Hek Ho dan telah koeroeng kota Gan Boen Koan begitoe rapet. Lebi djaoe dalem itoe warta dibri taoe, sabisa-bisa Tjio Tjong Tin soeda bikin perlawanan tapi pertjoema sadja. Poetranja itoe pembesar beroentoeng soeda bisa lolosken diri dan menoblos dari kepoengan moesoe, tiada lama poela tentoe bakal sampe di kota radja dan baroe balik kombali bersama-sama bala bantoean jang bakal di kirim.
Itoe hari Baginda lantas bersidang, di mana ada hadlir Lu Kok Tjaij dan brapa pembesar laen.
