— 1183 —
Djoega Te Sioepi, satoe pembesar jang terkenal radjin dan berati-ati, pada bebrapa boelan di blakang sablon terdjadi kariboetan telah dipindaken ka afdeeling Hoe Im Kaon, jang letaknja tiada brapa djaoe dari Djin Ho.
Begitoe djoega Te Sioepi telah di wartaken dan soeda dateng di tempat kariboetan, tapi kedatengan itoe soeda terlaloe lambat, kerna lebi siang itoe kawanan ketjoe soeda oendoerken dirinja.
Pertoeloengan-pertoeloengan perloe oleh ini pembesar Militaire lantas diatoer, teroetama bagi orang-orang jang loeka dan pademken api, agar itoe bahaja tiada memakan lebi banjak korban. Sasoedanja di bikin papreksa'an lebi djaoe baroe Te Kong mengetahoei, Jam Tikoan dan orang sadalem roema tangganja abis terboenoe.
Lebi djaoe Te Sioepi laloe bikin bebrapa soerat boeat bertaoeken itoe kariboetan ka kota radja dan pada bebrapa tempat jang berdamping dengen Dji Ho Koan, soepaja moelai dari itoe waktoe sasoeatoe pembesar soeka berlakoe ati-ati, djangan sampe kedjadian poela itoe katjilaka'an seperti di Djin Ho. Betoel di waktoe ampir terang tana Te Kong telah komendir tentaranja bikin pengedjeran pada itoe kawanan begal, tapi sebab marika soeda brangkat bebrapa djam lamanja, tentoe sadja ini pembesar tiada dapet soesoel pada marika itoe.
