— 1665 —
The An Gin apa boleh boeat tiada memaksa lebi djaoe, maka pada itoe hari bersama Tjeng Bwe teroes berpamitan sama Ko Kong dan jang laen-laen dan brangkat ka Djin Ho Koan aken lakoeken pakerdja'annja di sana.
Berbareng dengen itoe, Taij Goan Kong Tjo Keng djoega telah masoekin soerat permoehoenan, dalem mana ia minta pada Sri Baginda Keizer, soepaja ia bisa di kasi idjin boeat poelang doeloe ka roemanja, kerna ia hendak bikin sembajang dan laen-laen, samentara laen-laen pembesar jang baroe di angkat poen minta permisi begitoe djoega, jang mana satoe persatoe oleh Baginda Keizer telah di loeloesken.
Lebi doeloe dari itoe, pada satoe hari Bong Loan telah prenta pada bebrapa orang pergi ka Souw Tjioe, aken bikin betoel itoe roema berhala, di mana pada itoe hari ia soeda menginep bersama-sama Tjeng Bwe.
Djoega ia kirim banjak periasan boeat di taro dalem itoe bio.
Perboeatan ini gadis ada sanget di poedji oleh semoea orang.
Sedeng begitoe, atas perkenannja Sri Baginda radja, Ko Kong dapet onkost negri aken bikin betoel kombali ia poenja gedong di kota Gie Jang.
Setenga taon kamodian, gedong Tin Kok Hoe jang soeda djadi begitoe roesak telah di bikin baek kombali. Itoe roema besar di bikin lebi bagoes dari permoela kali; ka doedoekannja di bikin lebi besar, serta itoe merk besar jang tertoelis, „Tin Kok Hoe" sekarang tamba doea hoeroef di seboet „Tiong Jong Tin Kok Hoe."
