— 1664 —
Sebagi boedak jang setia poenja hari beroentoeng, Bong Loan bersama swaminja dan jang laen-laen telah dateng mengasi slamet, serta menganter djoega banjak bingkisan jang berharga.
Sebaliknja Kou Kongtjoe djoega telah tetepken hari nikanja Tjin Hie pada Heng Hoa.
Sasoedanja menika bebrapa hari lamanja, pada satoe hari The An Gien bri taoe pada Ko Kong, bahoea ia hendak melakoeken pekerdja'annja, dan minta djoega ajahnja di kasi boeat brangkat ka sana. Ko Kong loeloesken itoe perminta'an, tapi The Koen tiada maoe, dan ia tinggal mengikoetin sama itoe orang bangsawan.
Sebagimana kau taoe, anakkoe," kata The Koen, „Lo Ya poenja boedi ada begitoe besar, hingga biar poen begimana djoega akoe tiada bisa berpisa'an padanja. Lagi kau moesti inget, akoe soeda toea, kaloe moesti moendar mandir ka sana sini, tiadakah membikin akoe poenja diri mendjadi soesa?"
„Tapi djoestroe dengen adanja ajah di sana, bagi akoe ada mendapet satoe senderanjang tegoe," kata An Gin, betoel akoe soeda lama toeroet dalem pakerdja'an militair, tapi brangkali ajah poenja pikiran ada lebi-tinggi dari akoe. Maka darl itoe, akoe minta soepaja ajah bisa pergi ka sana, aken bantoe apa apa jang perloe dalem akoe poenja pekerdja'an."
„Akoe poenja niatan soeda djadi tetep, biar kau paksa bagimana djoega tiada nanti akoe meloeloesken," saoet The Koen.
Ko Kong denger oetjapannja itoe penggawe toea djadi tersenjoem.
