— 1663 —
bebrapa boedak ambil obat beberin di mana loekanja Djim Po.
Mendenger Bong Loan soeka loeloesken semoea orang telah menjataken poedjian atas kabedjikannja itoe nona moeda.
Djoega pada Soen Nio, Bong Loan telah mengasi ampoen, dan pandang, lantaran kelema'annja itoe njonja soeda toeroetken sadja ka hendakannja ia poenja tjoetjoe jang berbatin boeroek.
Itoe doea orang lantas di soeroe moendoer, tapi tiada lama satoe boedak prempoean dengen tersipoe-sipoe dateng mengasi taoe, Soen Nio dan Lo Djim doea-doea telah binasaken dirinja sendiri.
Semoea orang denger begitoe djadi mengela napas. Maitnja itoe doea orang lantas diprenta rawatken sebagimana moesti. Ko Kong jang dibri taoe hal itoe djadi sanget penasaran, kerna sabenernja ia poen hendak menegor apa-apa pada itoe njonja. Tapi sebab hal soeda kedjadian begitoe roepa, apa boleh boeat ia bikin ilang itoe pikiran jang tergenggem di dalem hatinja.
The An Gin pada satoe hari telah trima firmannja Baginda, serta minta salekasnja itoe orang moeda djalanken ia poenja pakerdja'an jang telah diseraken, tapi Ko Kong lantas madjoeken soerat perminta'an, boeat itoe ponggawa dikasi tempo bebrapa hari lagi, kerna ia moesti oeroes pernika'annja sama Tjeng Bwe. Perminta'an mana telah diloeloesken oleh Baginda.
Begitoelah pada satoe hari, itoe pesta kawinan telah di rajaken, di mana kedjadian rame djoega.
