— 1659 —
marika itoe, dan inilah bikin itoe njonja-njonja djadi seperti kasima.
Ia dapet kenjata'an, pakean-pakean itoe nona ada begitoe bagoes dan bertjhaja gilang goemilang, tiada ada satoe apa jang membikin hatinja tiada djadi kagoem dan boeat gegetoen.
Ko Siotjia waktoe dibri taoe oleh So Nio bahoea njonja-njonja itoe jang soeda merawatken Song In dari masi ketjil, tiada tempo lagi lantas berloetoet dengen hormatnja, perboeatan mana ditoeroet djoega oleh Wie Hoedjin dan jang laen-laen.
Soeda tentoe sadja hal itoe membikin Peng Si dan Thio Si djadi sanget goegoep, kerna tiada mengarti begimana ia orang haroes berboeat aken bales hormatnja itoe nona-nona jang tjantik. Tapi kamodian marika itoe berbangkit, bangoenken pada marika itoe dan kata:
„Kita orang ada sebagi tetamoe jang renda, boeat apa Nio-Nio sekalian pake atoeran begitoe roepa."
„Dji Wie Taij Taij ada orang-orang jang soeda djadi penoeloeng akoe poenja soedara, itoelah lebi dari pantes kaloe akoe hormatken lebi dari segala apa," kata Bong Loan dan jang laen-laen sembari doedoek kombali.
Dari sitoe satroesnja marika doedoek makan minoem dengen soeka hati.
Koenjoeng-koenjoeng itoe waktoe Bong Loan dapet inget pada Soen Nio dan Djim Po. Ini gadis sanget ingin mendapet taoe begimana soeda kedjadian dalem gedong Tin Kok Hoe di kota Gie Jang, begimana maka Song In sampe djadi
