— 1123 —
njonja bangsawan kliatan ada sanget berdoeka dan menjesel.
Sorenja Hok Tjoen baroe kliatan poelang. Ini orang moeda roepanja telah dapet firasat tiada enak dan ia sigra dapet taoe apa jang baroesan telah terdjadi, koetika brapa boedjang membri ketrangan hal itoe padanja. Lantas ia pergi ka kamarnja Soen Nio, di mana ia dapetken Kohnja lagi menangis Hok Tjoen poera-poera tiada taoe dan laloe menanja: „Sebegitoe lama akoe blon perna liat Taij-Taij begitoe berdoeka seperti di ini hari, maka boleh akoe dapet taoe lantaran apa?"
„Oh Tjoen, begimana matjem kau telah mamili istri, hingga berachir satoe kadoekaän bagi akoe," kata Soen Nio, „kau soeda menjaksiken dengen mata sendiri, begimana matjem istrimoe poenja kelakoean sedari ia tinggal di sini? Itoe orang roepanja tjoema anggep dirinja paling hartawan, paling di tjinta oleh ajah iboenja, hingga membikin rasa dirinja begitoe merdika, begitoe moelia melebiken dari segala apa."
Lebi doeloe dari ini Soen Nio soeda toetoerken begimana Dji Hoa poenja tjari sahari-hari.
„ Tapi — semoea boedjang boleh di tanja sabenernja dengen perkataän manis akoe bri nasehat padanja, begimana ia moesti boeang itoe kabiasan djelek, begimana setjara mantoe orang ia moesti berlakoe hormat pada saderek-saderek kita," kata
