— 1382 —
ka dalem, hingga si Gagoe dengen ah-ah oeh-oeh lantas manggoetin kapalanja. la maoe kata; „Betoel, akoe ingin bertemoe sama itoe orang- orang jang lagi doedoek bersantap, kerna di sitoe antaranja ada akoe poenja toean."
„Tjilaka ini orang gagoe!" kata itoe orang tadi sembari berpaling pada kawan-kawannja dengen tertawa.
Kamodian itoe bebrapa orang jang gailan lantas mengganggoe pada Sioe Tji, hingga ia ini djadi sanget mendongkol. Dengen roepa koerang senang ia memandang pada itoe bebrapa oppas.
„Kenapa kau begitoe koerang adjar, brani mengganggoe padakoe?" begitoelah Sioe Tji menegor pada itoe bebrapa orang seandenja ia bisa mengomong. „Akoe dateng boekan perloenja maoe di permaenken olehmoe, hanja maoe bertemoe pada akoe poenja madjikan!"
Kombali itoe bebrapa orang lantas tertawa, koetika liat si Gagoe berkata dengen ah-ah-oeh-oeh.
Djim Sioe Tji liat klakoeannja itoe bebrapa oppas jang koerang adjar hatinja djadi semingkin koerang senang. la rasa tiada baek aken beroeroesan sama orang-orang begitoe, maka ia lantas paksa maoe masoek ka dalem.
Tapi itoe oppas soeda tentoe sadja tiada maoe memberi idjin padanja, ia menghalangken di depan
