— 1345 —
sampe, jang djoega lantas bantoe bikin penjerarangan.
Sabentaran sadja rahajat begal soeda djadi bresi, katinggalan bebrapa poeloe orang jang dengen soekanja telah menaloek.
Dengen itoe kamenangan Song In sigra tarik poelang barisannja, tapi tempo sampe di Siang Kang, ia bertemoe dengen satoe barisan moesoe, jang roepanja soeda kala prang.
Itoe barisan jalah ada pasoekannja Siauw Pek Liong Heng Hin.
Tempo brangkat dari Sim Shia dan koetika djalan sampe di satoe oetan, ini kapala begal telah dipegat oleh Ma Leng In, jang lantas menjerang dengen seroe sekali; Heng Hin tiada bisa tangkis itoe penjerang heibat, maka dengen karoesakan besar sigra melariken diri dan hendak menjebrang di kali Siang Kang, tapi apa tjilaka dalem perdjalanan itoe telah bertemoe pada Song In.
Satoe pertempoeran seroe lantas terdjadi di deket pinggir kali.
Tiada antara lama Ma Leng In djoega sampe di sitoe tempat, beroentoen djoega dengen pasoekan Soe Peng. Itoe sadjoembla rahajat begal lantas dikoeroeng di sama tenga, Heng Hin sebab merasa tiada oengkoelan aken bikin perlawanan pada moesoe jang berdjoembla begitoe
