— 1275 —
„Djadi sekarang soeda tiada ada sangkoetan apa-apa lagi boeat kita,” kata Song In, „akoe kira baeklah kita orang brangkat djalan. Begimana Hengtiang poenja pikiran?”
Tjo Kongtjoe manggoetin kepalanja seraja menjataken setoedjoe.
Begitoelah satelah sampe pada esok paginja, sasoedanja bikin beres peritoengan sama pengoeroes roema menginep, Tjo Kongtjoe dan jang laen-laen telah landjoetken poela perdjalanannja ka kota radja.
Oleh kerna terdjadinja itoe bebrapa halangan di tenga djalan, maka dalem boelan Dji-gwe tanggal sembilan blas baroe Tjo Boen Pa dan jang laen-laen sampe di kota radja.
Koetika masi ada di tenga djalan, ia dapet ketrangan dari bebrapa orang jang tiada loeloes dan baroe poelang dari kota radja, bahoea dalem pengoedjian soeda di dapetken doea orang gaga perkasa, masing-masing soeda trima Goanswe In boeat pergi pimpin balatentara aken memaloem prang ka sebla Selatan dan Oetara, dari laen orang ia dapet ketrangan poela, orang jang loeloes tjoema satoe orang, tiada lama poela aken di bikin oedjian kombali boeat dapetken laen orang gaga aken memaloemken prang ka Selatan. Tegesnja ketrangan jang di dapet dari itoe orang-orang satoe sama laen sanget berbeda'an hingga tiada bisa di bilang mana jang lebi betoel.
