— 1276 —
Maskipoen kedatengan marika di sana soeda ketinggalan bebrapa hari, tapi keada'annja masi tinggal rame, sedeng apa jang terdjadi pada bebrapa hari di blakang masi rame di bitjaraken. Selagi Boen Pa tjari roema penginepan, koenjoeng koenjoeng satoe orang jang tiada di kenal hamperi padanja, jang dengen swara teges lantas menanja: „Apa Siangkong maoe tjari Hotel?"
„Betoel," saoet Boen Pa. „Di mana akoe bisa dapet hotel jang baek?"
„Akoe rasa tiada ada laen roema penginepan jang paling bagoes dan paling terinda dari pada akoe poenja Hotel," kata itoe orang sembari menoendjoek ka satoe roema besar jang mengadepin djalan raja. „Siangkong taoe, itoe orang jang soeda dapet reboet Goanswe In, bebrapa hari di moeka maoe toeroet oedjian ada noempang dalem akoe poenja Hotel."
„Oh, djadi sobat maoe bilang Hotel itoe ada djadi tempat menginepnja orang-orang bangsawan?" Kata Boen Pa sambil tertawa, dan sebab merasa soeka sama kelakoeannja itoe orang jang begitoe manis boedi bahasanja, maka ia lantas adjak Song In menginep di sitoe.
Tatkala itoe soeda ampir sore, maka Tjo Boen Pa lantas minta di sediaken arak dan barang hidangan, di mana kamodian bersama Song In dan
