— 1274 —
djaoe. Sateroesnja laloe di bitjaraken ka tempat mana ia moesti mentjari.
Sablonnja pembitjara'an itoe abis, toean roema menginep masoek ka dalem. la kata: „Soeda, boeat apa di riboetin lagi, toch itoe orang sekarang soeda poelang!"
„Begitoe!" kata Boen Pa dengen sanget girang, selagi ia maoe manjataken lagi, Song In soeda masoek ka dalem.
„Kau pergi ka mana, Hiante?" menanja Boen Pa. „Akoe soeda djadi kalang kaboet mentjari di sana sini!"
Si Gagoe djoega dengen tjaranja sendiri laloe pegang tangan Kongtjoenja, kaloe ia bisa mengomong tentoe djoega ia menanja, Kongtjoe pergi ka mana, kenapa baroe poelang dan laen-laen poela.
„Siauwte telah pergi ka satoe tempat jang paling djaoe pernanja dari sini," kata Song In jang membri ketrangan atas perdjalanannja, „akoe telah sampe pada bebrapa pasar di sebla Oetara, oetan-oetan jang lebet di sana........Tapi tjoba, Hengtiang toeloeng kasi taoe, di mana itoe koeda soeda dapet di ketemoeken, dan apa pentjoerinja soeda di seraken pada orang politie?
Atas ini pertanjaän Boen Pa lantas kasi taoe begimana ia soeda dapet ketemoeken itoe tiga koeda, begimana ia soeda berboeat pada itoe pentjoeri-pentjoeri, dan laen-laen hal lagi.
