— 1268 —
Bermoela marika itoe bergaoel setjara temen biasa sadja, tapi pelahan-pelahan Joe Liok tjintaken itoe doea Niko, jang memang parasnja poen tiada haroes di tjela. Ini maksoed Joe Liok telah njataken pada itoe doea orang, jang sedikit poen merasa tiada halangan dan trima itoe perminta'an.
Begitoelah sedari itoe waktoe ia orang idoep sebagi laki istri.
Joe Liok doeloean soeda perna bekerdja bebrapa hari di roemanja Sian Wan-gwe, tapi sebab ia poenja kelakoean tiada bagoes, lagi sanget pemales, maka oleh njonja Wan-gwe lantas di kasi brenti.
Pakerdja'annja Joe Liok selama ia tinggal dalem itoe bio poen boekan laen, jalah setiap malem pergi keloear mentjoeri, menggasir roema orang dan laen-laen pekerdjahan djahat. Brapa kali ia dapet di pergokin oleh orang politie di kota, tapi sebab soelitnja, lagi ia poenja tempat tinggal ada dalem oetan jang begitoe soenji, maka sabegitoe lama politie blon bisa dapet tangkep padanja.
Djoestroe pada satoe hari ia pergi djalan-djalan di pasar, di mana ia telah liat Tjo Kongtjoe dan Song In brenti di itoe roema penginepan. Ia taoe itoe koeda boeloe item jang di toenggang oleh Boen Pa, jalah itoe koeda jang sering di doedoeki oleh Ouw-jan Peng, dari siapa ia sering dapet ketrangan, itoe koeda ada binatang baek, bisa toeloeng madjikan dan laen-laen lagi.
