— 1269 —
Joe Liok pikir, itoe tempo di dalam negri sedeng perloe pake orang-orang gaga, maka koeda jang begitoe bagoes tentoe bisa dapet pembeli jang brani membajar harga mahal. Dengen dapet itoe pikiran Joe Liok niat aken tjoeri itoe koeda.
Begitoe djoega soeda kedjadian dengen itoe pentjoerian koeda, sekarang pembatja tentoe tiada djadi heran kaloe Tjo Kongtjoe soeda ketemoeken binatangnja di itoe bio, serta siapa jang djadi pentjoerinja.
Lebi doeloe ini orang njataken trima kasi pada Allah dan sekalian malaekat, jang soeda oendjoek ia djalan kasitoe, kamodian dengen pedang terhoenoes ia masoek ka dalem, hingga membikin itoe tiga menoesia keparat djadi kaget sekali.
„Hm, koempoelan bangsat!" treak Boen Pa dengen mata terpoeter memandang itoe tiga orang jang sedeng hadepken barang santapan. „Brapa hari akoe soeda koeliling tempat, brapa banjak akoe soeda boeang tjape, kiranja akoe poenja koeda kau jang soeda tjoeri! Oh, menoesia kedji, boleh djadi lantaran kau poenja perboeatan ini memang Allah oendjoek djalan boeat akoe binasaken kau poenja djiwa!"
Itoe tiga orang djadi sanget ketakoetan, satoe persatoe lantas berloetoet seraja meminta ampoen,
„Akoe tiada taoe kaloe itoe koeda Kongtjoe jang poenja," kata Lo Tji dengen meratap, „akoe
