— 1266 —
ada tidoeran saorang lelaki sembari menjanji; tiada djaoe dari sitoe, jaitoe di dapoer, ada doea orang laen jang berpakean lelaki, tapi roepanja mirip sebagi orang prempoean. Ini doea orang lagi adepin satoe kwali besar, dalem mana ada kaliatan apa-apa jang lagi di masak
Sabentar poela kaliatan itoe doea orang memboeka lemari toea jang ada di deket dapoer masak, ia kloearin bebrapa mangkok besar sembari tertawa haha hehe.
„Hajo bangoen, daging soeda mateng!" Kata sala satoe itoe doea orang dan perkata'an itoe di toedjoeken pada itoe saorang lelaki jang lagi tidoeran. „Apa brangkali kau nanti merasa kenjang dengen menjanji sadja?"
„Daging soeda mateng, tapi akoe poenja arak kenapa blon djoega maoe di kloearken?" Tanja itoe orang lelaki sembari balik badannja dan tidoer miring. Toeloenglah bikin anget akoe poenja arak!"
Tjo Kongtjoe berdiri di sitoe sampe lama djoega, tapi satelah liat marika itoe kaloearken arak dan laen-laen, ia poen lantas maoe menjingkir, kerna merasa tiada perloe tonton orang maoe bersantap. Blon bebrapa tindak ia berlaloe koenjoeng-koenjoeng ia dapet denger swara koeda berbenger, hingga hatinja itoe orang moeda djadi tergerak. Ia lantas tjepet pergi ka blakang, di mana itoe swara telah terdenger.
