— 1265 —
ada hawa goenoeng, tapi kaloearnja dari satoe goemploekan oetan-oetan, boekan dari poentjak atawa selat-selat goenoeng.
„Akoe soeda liat dan dapet kenjata'an, di sini semoea oetan belaka, tiada ada tanda-tanda roema orang” kata ia. „Heran sekali itoe asep kloear dari mana?”
Sebab penasaran, achir-achir ini, orang moeda berdjalan lagi dengen liwatken bebrapa poentjak boekit di sepandjang djalan, berdjalan djaoe djoega ia telah dapet soesoel di mana adanja itoe asep, jang ternjata kloearnja dari dalem satoe bio di dalem itoe oetan.
Boen Pa djalan mengider di pekarangan roema berhala, kamodian ia sampe pada satoe djendela dan dari sitoe ia memandang ka sebla dalem, tapi tiada kaliatan apa-apa. Di bagian depan dari itoe roema soetji tiada ada orang, selaennja patoeng-patoeng jang teratoer di atas medja tinggi.
Tatkala itoe mata hari soeda silem ka Barat, keada'an di sana sini poen soeda gelap. Boen Pa sigra lompat masoek ka dalem; ia djalan di antara pertenga'an dan achirnja ia dapet denger swara orang menjanji.
Perlahan-lahan Boen Pa ikoetin di mana kloearnja itoe swara, jang kamodian ia dapet kenjata'an ada bebrapa orang lagi bekerdja di dapoer. Di sitoe ada terletak satoe bale toea, di atas mana
