— 1196 —
masi ada di praoe, baek prenta Bauw Hian bawa arak jang di tjampoer ratjoen kasi Hok Tjoen minoem, dengen begitoe djiwanja nanti melajang ka doenia baka.
„Kaloe Hok Tjoen soeda mati, kita masi bisa dapet laen djalan lagi boeat bikin tjilaka itoe doea prempoean gladak," kata ia lebi djaoe, „kita madjoeken soerat pengadoean pada pembesar di sini dan toedoe itoe doea orang soeda ratjoenken akoe poenja swami. Biar begimana djoega hakim tiada nanti tinggal diam dan bakal djatoken hoekoeman atas dirinja. Djika soeda kedjadian begitoe roepa, baroelah hatikoe merasa poeas!"
Joe Kong denger sasoeatoe perkata'an Bauw Si dengen badan sabentar bergidik, kerna maksoed jang terkandoeng dalem hatinja itoe katjinta'an ada begitoe berbahaja dan bikin hatinja merasa ngeri.
„Sablonnja berboeat paling baek Nio Tjoe soeka berpikir lebi doeloe, soepaja penjeselan tiada dateng blakangan." kata ia. „Kau moesti Inget, perkara djiwa boekan oeroesan jang boleh di bikin maen-maen.......”
„Pwe! akoe tiada kira kau ada satoe lelaki jang begitoe pengetjoet!" kata Bauw Dji Hoa sambil memboeang loeda. Djikaloe akoe taoe kau ada saorang jang penakoet, tentoe akoe poen tiada ingin toeroet kau poenja kahendak dan berhoeboeng tjara begini!”
