— 1195 —
berlakoe poeas seperti ia berlakoe sama istrinja jang baroe, kita poenja resia kaloe ia dapet taoe tentoe tiada maoe soeda, dan satoe tempo boeat ini perkara ketjil kita berdoea poenja djiwa ada terantjem bahaja kematian!"
„Abis sekarang kita haroes berlakoe begimana?" Begitoe Joe Kong menanja dan ini boeaja darat poen ada kaliatan djadi sanget berkwatir.
Bauw Si bengong sabentaran seraja tjari pikiran boeat djawab pertanja'an katjinta'annja. Roepa-roepanja ini prempoean doerhaka telah dapet pikir apa-apa, dan pikiran itoe boleh djadi ada mengandoeng kahendak jang berbahaja, kerna bisa di liat dengen ia poenja senjoem iblis jang sabentar-bentar di kasi oendjoek pada Joe Kong.
„Banjak djalan akoe soeda pikir, tapi tjoema satoe djalan sadja jang rasanja paling baek dán tiada nanti bikin perhoeboengan kita djadi beroba sebagimana adanja." Begitoe ia kata.
„Akoe rasa Nio Tjoe tiada merasa kaberatan boeat bri taoe perkara apa jang kau hendak berboeat?" Menanja Joe Kong.
Sasoedanja berdiam sabentar Bauw Si lantas bertaoeken maksoednja, jaitoe hendak binasaken sadja djiwanja Hok Tjoen dengen goenaken pengaroenja ratjoen. Boeat bisa berboeåt dengen dapet asil sebagimana jang di harep itoe tempo ada koetika jang sanget baek; Hok Tjoen sekarang
