— 636 —
orang jang soeda mendjadi mait ? dan lantaran apatah Tjhouw Peng Ong telah desek mantri-mantrinja jang setiawan? Tje Siang Kong, sasoeda boenoe Phang Seng, laloe tekap koeping sendiri; tapi siapatah itoe prampoean jang diseboet Kiang Lie? Tang Toh boekankah ada ajah angkatnja Lu Poh, tapi kenapatah kamoedian ia boenoe ajah angkatnja itoe? Kwe Hoa, mengpatah sasoedanja mati masi ditertawai orang? dan sebab apatah ia moesti mati terkeniaja, hingga kadoea orang toeanja djadi terlantar? Lioe He Hoei, ia soeda berboeat kabaekan apatah, maka namanja sampe di ini masa masi terpoedji orang ?— Djawablah soedara, djawab! kerna akoe ingin sekali taoe, begimana hikajatnja ini bebrapa orang. Kaloe soeda, lantas dateng itoe giliran, boeat akoe djawab kau poenja pertanjaän."
Hok Tjoen mengap-mangap seperti ikan di daratan, sambil oesoet-oesoet blakang korsi, sedeng kringet dingin mengoetjoer di djidatnja.
Ko Siotjia awasin tingkanja itoe telaki kedji dengen bersenjoem ewah. Kamoedian, sambil berbangkit, si nona berkata pada hambanja: „Ajo Tjheng, toeroet akoe djalan-djalan di taman: hatikoe merasa pepat sekali diam disini."
