— 637 —
„Apa Siangkong denger ?" kata Tjheng Bwe pada Hok Tjoen, sedeng nonanja berdjalan kaloear: „Akoe harep Siangkong soeka berlaloe sabentaran, kerna pintoe ini kamar maoe dikoentji.”
Ini perkataan ada sama sadja seperti aer satahang jang digoenaken boeat koetjoer kapalanja itoe lelaki kedji.
Dengen merasa amat maloe, Hok Tjoen lantas berbangkit dan berdjalan dengen tindakan limboeng.
Orang nanti kira ada doea Hok Tjoen di itoe gedong, kaloe meliat, begimana koetika dateng ini djahanam soeda oendjoek tingka lakoenja jang amat girang, dan begimana temponja kaloear, ia berdjalan dengen toendoek, sambil garoek-garoek blakang koeping, jang tida sekali merasa gatel.
Lo Keng sendiri, jang berdiam dalem kamarnja itoe lelaki kedji, djoega moesti tahan tertawa, tempo meliat katjintaännja masoek dalem itoe kamar dengen meroengkoet seperti orang oetan jang abis dikedjer oleh pemboeroe. Ia mengarti, jang katjintaännja itoe tentoe soeda kena toebroek tembok doeri, jang kedja ia meringis begitoe roepa.
Tetapi sedeng soeda taoe itoe lelaki kedji ada dapet perkara jang traenak, Lo Keng itoe sengadja menanja begini:
