— 635 —
saorang jang tida mempoenjai temen jang faham soerat dan djoega blon perna bergoeroe, kaloe dibilang tida kenal itoe bikajat Giok-keng-taij, adalah djamak djoega; tapi kau, kau — satoe Sioetjia mengakoe tida taoe itoe tjerita, sasoenggoenja moesti merasa maloe!”
„Tapi akoe brani soempa, sasoenggoenja akoe tida taoe,” kata itoe djahanam, sedeng moekanja djadi mera sedikit.
— „Kaloe kau rasa, itoe hikajat bisa tambaken kau poenja pengatahoean, baeklah akoe nanti tjeritaken; tetapi terlebi doeloe kau moesti djawab akoe poenja pertanjaän.”
Itoe Kongtjoe idoeng poeti djadi bingoeng, kerna koeatir nanti tida bisa djawab itoe pertanjaän. Tapi sablon ia bisa bilang apa apa, Ko Siotjia soeda lantas berkata poela:
„Dengerlah : orang lelaki perloe apa disoeroe tjari peladjaran dan tiroe segala perboeatan orang jang baek? Kiat dan Tioe, boekankah masing-masing ada mendjadi Keizer, masing-masing ada berkoeasa atas berlaksa rahajat negri, tapi mengapatah sampe sekarang itoe doea orang masi ditjatji sebagi Radja jang tida adil? Ngo Tjoe Sie kenapa moesti pindjem balatentara boeat moesnaken karadjaän Tjhiauw dan moesti petjoet
