— 770 —
semoea soeda dapet di singkirken, sedeng pakerdja'an besar jang di serahken dalem tanganmoe, seanteronja telah dapet di seleseken dengen sampoerna. Soenggoe djarang terdapet sa-orang ponggawa jang begitoe besar djasanja pada negri, sampe dapet gelaran jang begitoe moelia, selaennja Ko Kong sendiri. Tapi sajang sekali, itoe kamoelia'an jang kau dapet dengen tjara mengadoe djiwa, melawan berbagi-bagi bahaja dan kasengsara'an, ini tempo kau soeda bikin roesak dan ilangken kaperijaja'an sendiri! Orang toedoe Ko Kang telah bersariket sama Pak An Ong, aken sama sama menjerang negri karadja'an Song, apa betoel? Song Sie, begitoe perloe soeda dateng kemari: ia menerangken, ia taoe semoea dari kau poenja perhoeboengan dari Pak An Ong, dan laen-laen sifat jang menggenggem niatan hianat. Atas itoe semoea toedoean, akoe silaken Ko Kong bikin pembela'an dan barangkali bisa menerangken, bahoea Song Sie poenja pengadoean ada mengandoeng satoe alawa laen sebab jang membikin ia sampe berboeat begitoe roepa."
„Boeat ini perkara, akoe tiada bisa menerangken laen dari pada apa jang sabenernja soeda terdjadi, menjaoet Ko Kong. „Djika Taijdjin maoe taoe dari hal Song Sie beginilah: Orang itoe ada akoe poenja sala satoe soldadoe koeda, ia soeda boeron dari pakerdja'an sebab takoet dapet hoekoeman,
