Tantang biliak lamari bungo, bamacam bungo nan tampak, bungo culan bungo ros, bungi anggrek kambang sore, bungo buatan gadih Kalasun, ado satangah dari lilin, ado palastik barang atom, ado pulo dari suto, indah rupo dipandangi, patuik Kalasun jadi guru, jadi guru sekolah eskape, kapandaian banyak di kapalo.
Di hari nan sahari itu, rami urang di rumah Kalasun, hiruak pikuak anak-anak, anak-anak bamain dilaman. Lah malam candonyo hari, tapasang lampu sitarongkeng, lampu tapasang limo buah, di laman di dalam dapua, sarato di rumah tigo buah, tarang sarupo siang hari, taraso paneh dalam rumah.
Tadanga adzan di surau, adzan sumbahyang isya, langang rumah sakutiko, urang bajalan pai ka surau, kan iyo Siti Kalasun, darah di dado turun naiak, hati di dalam tidak sanang, malang untuang buruak bagian, dapek laki tukang garobak, urang hitam kumuah pulo, abuak muko capuak, raso tampak muko si Saba, tak ado urang sabaruak inyo. Ado sabanta antaronyo, tadanga sipatu urang di laman, urang nan banyak ka rumah, di siko Kalasun batambah kucuik, ayia mato badarai-darai, bak maniak putuih talingo, sabagai intan putuih pangarang, basah pipi muko nan kuniang.
Alah tibo marapulai, diiriangkan rang mudo nan banyak, satu tibo duduak di kasua, duduak di kapalo rumah nan gadang.
Basasak urang maliek, urang mancaliak tantang dapua, tidak tingga nan gadih mudo-mudo, bakato inyo samo inyo, babisiak-bisiak urang di dapua, sarancak iko urang mudo, rupo sabagai anak rajo, apo sababnyo Siti Kalasun, mangko hatinyo tidak sanang, sarupo urang kanai kabaji, rintang baurai ayia mato, ka mano urang ka dicari, nan labiah rancak dari iko, ruponyo Kalasun sangat sombong, pandai mandehnyo mancarikan, pandang anak pandang minantu.
Kan iyo si Sabarudin, pakai saluak deta ungu, badacak bana di kapalo, pakai baju lakan hitam, baju kalepak dasi hitam, sarupo rajo naiak nobat, awak kuniang muko bulek, rambuik mahitam di kapalo.
16
