hormat ka ibu bapak, tidak ado mahantikan tangan, lapeh ka dapua inyo manganyam, indaknyo pandai batandang-tandang, gadih panggalak jago tidua, kasayangan urang dalam kampuang, jadi tuladan gadih nan banyak.
Ado sabanta antaronyo, alah sudah minum jo makan, sanan lah tibo si Fatimah, mandeh kanduang Gadih Ranti, duduak basimpuah di muko kakak.
Bakato Datuak Batuah, “Mano kau upiak si Ranti, elok ka laman lah dahulu, ambo batutua jo mandeh kau, indak elok didanga urang.”
Kan iyo si Gadih Ranti, dianjua turun ka laman, sanan bakato Datuak Batuah, “Adiak kanduang Siti Fatimah, ado sabuah denai katokan, lorong kapado si Gadih Ranti, diliek rupo dipandangi, anak baransua gadang juo, lah patuik inyo dibari kawan, dicari junjuangan si Ranti.
Tatkalo kito lai lapang, indak elok balalai-lalai, kito maharam pisang masak, mupakat malah jo bapaknyo, turuiklah bapak si Ranti, himbau ka rumah kini juo, inyo nan duduak di palanta, palanta lapau si Lelo,” katonyo Datuak Batuah.
Mandanga kato nan bak kian, tagak sakali mandeh si Ranti, bagageh turun ka laman, dituruik lapau si Lelo, tampak bapak si Ranti, duduak bajuntai di palanta, dihimbau disuruah ka rumah.
“Tuan Datuak manantikan, ado etongan nan paralu,” katonyo mandeh si Ranti.
Mandanga kato nan bak kian, tasirok darah si Pakiah Sutan, lah bagageh bajalan pulang, satu tibo duduak basalam, sanan bakato Pakiah Sutan, “Lah lamo Tuan ka rumah?”
Manjawab Datuak Batuah, “Sajak cako ambo duduak, alah duduak jo makan. Manolah Pakiah bapak si Ranti, lai bana nan takana,
14
