mamarah urang kampuang, indak manaruah ibo kasihan, bana tak buliah disabuik, kato tak dapek dijawab.
Kalau bakato sabuah sadang, manggayuang sakali putuih, bagak nan bukan alang-alang, lompek sakayu kain, badannyo gapuak tinggi gadang, batih sarupo batang manau, uban panuah di kapalo, tak ado urang nan malawan, takuik sagalo hamba rakyat, kalau dilawan tidak talawan, makan kakinyo maruntun manau.
Sungguh baliau orang tuo, umua hampia tujuah puluah, uban lah panuh di kapalo, namun baito gaek badan, paratian sarupo urang bujang, rang gaek taruang asam, awak gaek salero tajam, pantang maliek anak gadih.
Kalau diliek padusinyo, labiah duo puluah urang, tiok tahun inyo babini, lapeh surang baganti surang, habih manih sapah dibuang, mano bininyo nan dicaraikan, tidak buliah diganti urang, kalau diganti urang nan lain, alamat badan ka binaso, dituduah maliang jo mancuri.
Kato badanga di urang ateh, masin muluiknyo di Tuan Kamandua, Angku Lareh pun sangaik sayang, pangaduan baiyokan dek Tuan Luhak, itu mangko urang takuik, tidak ado nan badatiak, takuik sagalo urang nagari.
Birawari Angku Kapalo, bakato ka tukang kudo, “Pasanglah bendi Bugih, bari pakaian kudo balang, buliah dibao pai rapek, ambo bajalan pagi nangko.”
Mandanga kata nan bak kian, balari sakali tukang kudo, balari bagageh-gageh, diambiak kudo nan balang, dipasang bendi Bugih.
Kan iyo Angku Kapalo, balari naiak ka rumah, dituka pakaian hanyo lai, dikanakan sarawa pintalon, pintalon putiah guntiang parian, lakek baju lakan hitam, baju kulepak guntiang kaliang, lakek sisampiang bugih ungu, saluak tateleng di kapalo, lakek camin mato ameh, angkuah sarupo lareh-lareh, tampan sarupo rajo-rajo.
Lah sudah inyo mamakai, kudo dilacuik lari kancang,
4
