PERINGETAN DARI TEMPO DOELOE.
di atas korsi males, iapoenja antero lelakon penghidoepan dari 40 taon berselang teroes sampe di sa'at jang paling belakang ada terpeta satoe per satoe dengen tambah lama semingkin njata hingga ia sendiri mendjadi heran. Dan satoe kalih soedah inget kombali pada itoe segala kasedepan, kakoeatiran dan kadoeka'an jang ia perna alamken dalem lelakon pertjinta'annja pada Sian Nio, segala gontjang-gontjangan heibat dari tempo doeloe ia lantes rasaken poeja. Koetika ia kenangin pada itoe kasedepan dan kaberoentoengan salagi hidoep bersama Sian Nio di Tjikoeda Pateuh boeat satoe taon lamanja, Tham Tjay mengelah napas pandjang dan oetjapken, dengen soeara meratap, pada diri sendiri; „Ach, djikaloe kiranja akoe bisa hadepken kombali itoe kaberoentoengan di tempo doeloe, biarpoen akoe moesti kailangan antero milik dan bekerdja mendjadi koeli dengen gadji tiga poeloeh roepiah saboelan, nistjaja akoe hendak lakonin !"
Di itoe sa'at Tham Tjay loepa jang dirinja soedah djadi satoe kake toea jang berpenjakitan dan ampir masoek di lobang koeboer. Berbareng dengen itoe ia poen dapet oesoet sebab sebab dari itoe kamoeroengan dan perasa'an tida poeas jang sakean lama ada melipoeti pada dirinja. Itoe kasedepan hidoep bersama Sian Nio jang ia tjinta sagenep hati telah meninggalken bekas jang sanget dalem pada iapoenja soemanget. Kakerasan hati dan kagiatannja boeat mentjari kakaja'an bisa bikin ia loepaken itoe peringetan tentang Sian Nio jang soedah tersingkir djaoe dari otaknja, tapi di lapisan sabelah dalem dari toempoekan aboenja sang tempo, itoe barah dari pertjinta'an dan baoe jang haroem dari doepa kaberoentoengan di tempo doeloe, masih menja-
68
