PERINGETAN DARI TEMPO DOELOE.
boeat oeroesan dagang, samoea disebabken dari adanja itoe perasa'an tida poeas dan oering-oeringan atas segala apa jang ia hadepken — dari bekerdjanja itoe ganggoean resia jang ia sendiri tida sanggoep oesoet soember atawa sebabnja, dan tjoemah bisa diloepaken kapan ia lagi toemplek pikirannja ka dalem oeroesan dagang, bekerdja keras dan ripoeh dari pagi sampe malem, pada waktoe mana ia tida inget lagi pada laen-laen hal, dan malah bisa djoega bergirang dan bergoembirah kapan dapet kaoentoengan bagoes atawa terlolos dari karoegian jang mengantjem. Tapi begitoe lekas pikirannja dapet mengaso, tida dibikin ripoeh dan tjape oleh oeroesan dagang, itoe perasa'an-perasa'an jang tida enak dan tida poeas moelai dateng kombali, membikin ia djadi oering oeringan pada segala apa jang beräda di sapoeternja, dan ini kamoeroengan djadi semingkin keras koetika ia oendoerin diri dari perdagangan dan berdiam di Soekadingin boeat tetirah dan mengaso, jang menjebabken aliran pikirannja tida bisa ditoedjoeken poela ka djoeroesan jang biasa.
Begitoelah dalem pertjoba'annja boeat mentjari soeloeran baroe ka mana pikirannja jang tida bisa diam dan selaloe koerang poeas hendak dialirken, Tham Tjay sekarang, di itoe maleman Sientjhia, berbiloek ka djoeroesan jang soedah lama sekalih ia tida perna ingetin, jaitoe pada lelakon dari penghidoepannja di tempo doeloe, koetika masih moeda dan tinggal di Soekadingin jang mendjadi kota kalahirannja. Dan satoe kalih pikirannja moelai mengalir ka itoe djoeroesan, lantes segala kadjadian jang soedah samar dan boeras moelai terbajang kombali dengen njata satoe per satoe, dan pada itoe sa'at, salagi rebah
67
