PERINGETAN DARI TEMPO DOELOE.
sama sekalih. Maski sekarang ia ada hadepken pengharepan jang bergoemilang boeat dapet kaoentoengan oewang dan kakaja'an, itoe samoea seperti barang tida berharga, kerna hatinja soedah djadi kosong dan mati, tida ada hiboeran dan pengharepan satoe apa lagi.
Itoe niatan aken bikin abis djiwa sendiri, jang doeloean telah timboel dalem ingetannja Tham Tjay koetika mendapet kabar Sian Nio telah menika, sekarang dateng kombali. Meninggalnja itoe kekasih lantaran sakit tering, jang biasanja ada berhoeboeng dengen kadjengkelan dan kadoeka'an, membajangken bagimana tida beroentoeng hidoepnja Sian Nio dengen itoe soeami, pada siapa amat boleh djadi ia telah dipaksa aken menika tjoemah boeat toetoep maloe dari familienja dan toeloeng kahormatan dirinja jang telah tertjemer lantaran lari minggat dengen Tham Tjay jang dipandang sabagi lelaki djahat, pentjoeri dan penipoe, dan itoe anak jang ia lahirken di loear pernikahan dipandang oleh orang banjak sabagi „anak haram.” Djikaloe boekan boeat menoetoep maloe dan mendjaga kahormatan dari iapoenja diri, familie dan itoe anak, pastilah Sian Nio menolak aken menika dengen itoe orang Tionghoa totok jang soedah toea dan pantes mendjadi iapoenja ajah, pada siapa ia tida poenja perasa'an menjinta, hingga pastilah dalem itoe beberapa taon selama mendjadi istrinja Lim Sam, ia hidoep dengen sanget tjilaka. Djikaloe kiranja ia dan Sian Nio tida tertjerei dengen paksa dan satjara begitoe mengenesken, pastilah itoe kekasih bisa hidoep lama, kerna maskipoen toeboehnja koeroes dan pikirannja sensitief atawa gampang terharoe, Sian Nio ada sampe sehat dan djarang sakit. Tham Tjay tida terlaloe sedih
62
