PERINGETAN DARI TEMPO DOELOE.
ia tida soeka meliat pemandangan natuur jang indah, bikin perdjalanan ka tempat-tempat rame dan termashoer jang ia belon taoe koendjoengin, kerna ini matjem kasenangan ia tida perna pikirin atawa hargain. Maski sabagi soedagar besar ia ada poenja banjak kenalan, orang jang djadi iapoeja sobat ada amat sedikit, dan itoe persobatan tjoemah berwates dalem kalangan dagang, jaitoe jang berhoeboeng sama kaoentoengan, dan begitoe lakas ia oendoerin diri, itoe sobat-sobat poen toeroet linjap, kerna di loear dari oeroesan dagang ia tida soeka bergaoelan dan, berbada dari laen-laen orang Tionghoa hartawan, ia tida soeka tjampoer pakoempoelan aken tjari kadoedoekan tinggi dan nama bagoes di dalem siahwe. Kasenangan satoe-satoenja jang Tham Tjay poenjaken tjoemah kapan ia berdoedoek mengadepin medja toelis dalem kantoornja aken atoer dan pimpin pakerdja'an, pereksa boekoe-boekoe, rapport dan tjatetan dari pendjoealan dan pembelian, membatja soerat-soerat dan samboet telefoon dari laen-laen soedagar jang berhoeboengan padanja. Kagirangannja jang paling besar adalah kapan ia bisa toetoep kontrak jang mengoentoengken atawa, dengen goenaken kalitjinan dan katjerdikan, ia bisa lolosken diri dari karoegian jang mengantjem, atawa bisa selomotin laen soedagar jang koerang tjerdik dan awas, boeat kaoentoengannja sendiri.
Kasenangan dalem roemah tangga poen ia tida perna pikirin. Koetika istrinja, anak prampoean dari saorang hartawan, meninggal doenia pada sapoeloeh taon laloe, ia hidoep boedjang teroes-meneroes, kerna anggep adanja satoe istri tjoemah membesarin ongkos penghidoepan dan menghalangin ia toemplekin tempo dan tenaganja dalem oeroesan pakerdja'an. Dari doea poetranja ia tida
5
