— 374 —
penghidoepan. Batinnja telah mendjadi toewa sabelon dateng waktoenja, ia telah tjape lantaran berdaja boeat penghidoepan, ia soeda lelah oleh kerna banjak ngalami. Dalem kasoenjian, pernah ia tanjaken diri sendiri, apa ia ada bersalah, jang kamelaratan ada menjoesoen tindih diatas kapalanja, dan koetika itoe, ia soeda tida bisa sangkal, jang kasoesahannja, sabagian ada lantaran perboeatannja sendiri jang sesat, tapi biar poen bagimana, memang djoega orang belon pernah berlakoe padanja dengen katjintahan dan kabaekan.
Kadang-kadang ia menginget pada soedaranja, Stephanie, pada siapa soeda sakean lama ia ada koerang baek. Apa doenia ada berlakoe pada soedara itoe seperti jang telah kadjadian pada dirinja? O, ia djoega ada dapet bagian dari itoe mega mendoeng, itoe poen tida bisa disangkal. Apa Rudolf tida bri rasa tjilaka seperti Coburg? Dan lagi Graaf de Lonyay, apa ia itoe ada lebi dari Graaf Mattachich? Ja, orang telah seret Mattachich dalem perkara wissel, persalahken ia telah palsoeken tanda tangan dan sabaginja. Tapi apa tida sampe terang dan njata, jang ia sama sekali tida ada sabagimana jang ditoedoeh? Orang
