— 373 —
sabisamoe, soepaja kaoe tinggal baek padanja, kerna itoe ada perloe sekali."
„Akoe poenja niat tida sedikit aken menggentoes ia poenja haloean. Kaloe ia bisa, dari doeloe djoega ia soeda menoeloeng padakoe, tapi adalah soesa sekali, aken ia tjampoer tangan dalem perkara si kolot, jang sanantiasa moesoeken akoe."
Graaf Mattachich meliat pada lontjeng, kamoedian laloe berkata poelah:
„Tapi sekarang soeda sampe temponja aken kitaorang brangkat."
Sapoeloe menit kamoedian, iaorang soeda ada di station, dimana kreta soeda ada bersediah aken brangkat.
Lagi satoe kali marika mendjabat tangan, kamoedian iaorang melambei dengen sapoe tangan, dan sigra djoega kreta brangkat membawah poetri soeloeng dari Maha Radja Leopold ka Brussel, iboe kota tanah lahirnja, jang dalem kian-kian tahon tida diliat olehnja, satoe kota, dimana banjak tersimpan peringetan jang sedih bagi ia, tapi banjak peringetken djoega, penghidoepan manis dari doeloe-doeloe.
Ia sekarang boekan lagi satoe poetri moeda jang berhati goembira, jang sorot matanja ada kentaraken broentoengnja
