— 560 —
„Bagimana kaoe poenja pengliatan? Apa si sakit ada djadi lebi baek?”
Dr. Thiriar gojang kapala.
„Tida ada laen djalan dari lakoeken potong,” kata ia, „kerna baginda tida nanti bisa tinggal hidoep lagi doewa belas djam lamanja, bilah ka'adahan ada seperti sekarang.”
„Dan kaloe dipotong . . . . .”
„Ada sanget berbahaja. Akoe dateng padamoe, djoestroe boeat minta kaoe kasi taoe ini hal pada barones. Ia sekarang ada rebahken badan boeat mengasoh sabentaran, dan akoe poen lebi soeka tida menggangoe padanja, jang soeda begitoe banjak menanggoeng tjape, tapi sabaliknja akoe ada merasa koerang enak, djika lakoeken sadja potong, dengen tida kasi taoe lebi doeloe padanja.”
„Baek, akoe nanti tjeritaken padanja sabagimana kaoe poenja perbilangan," kata toewan baron, kamoedian lantas berlaloe.
Koetika Barones de Vaughan dapet denger dari pengawal kamarnja, apa jang Baron de Groffinet maoe kasi taoe padanja, laloe ia menoetoepi moeka dengen kadoewa tangan.
„Tentoe djoega ia tida nanti bisa tahan!”
