— 338 —
Doenia sabagi satoe kalangan,
Dimana djarang ada halangan,
Aken ibelis londjorken tangan,
Mementjarken ia poenja serangan.
Tapi misti ada penghabisan,
Ada berboeat ada pembalesan.
Begitoe samoea misti berachir,
Misti mati apa jang terlahir.
⁂
Barones de Vaughan menempatken poelah villa Vanderborgh, jang berada di Heysel dalem kota Laeken.
Oleh kerna Lucien Durieux soeda tida lagi ada bersama-sama, djadi baginda merasakeu lebi laloewasa, koendjoengi si djantoeng hati. Sering kali Sri Maha Radja Leopold II ambil djalan meliwati djembatan, jang sangadja ia soeroe bikin dari astana Stuyvenberg teroes sampe di villa nona barones.
Caroline poenja tempat tinggal, baginda anggap seperti roemah-tangganja sendiri. Ia merasaken sabagi ia ada poenja hak jang sedjati, aken mendjadi toewan di itoe villa. Ia bermaen-maen pada Lucien dan Philippe jang masi ketjil. Ia hidoep sabagimana sering ia berharep djalani penghidoepan!
