— 339 —
Barones poenja klakoean pada orang di loearan, masi tinggal agoeng sadja seperti jang doeloe-doeloe. Ia tida poenja kalahiran bangsawan, dalem toeboenja tida sedikit ada mengalir dara agoeng jang aseli, jang salaloe ada lebi soeka berlakoe rendah pada sembarang orang. Tetapi pada Sri Maha Radja ia bertingka-lakoe laen sekali. Baginda ampir boleh dibilang malaenkan kenal Caroline jang manis, jang salaloe bisa tertawa amat merdoe dan bisa bitjara sembari bersenjoem.
Lama kalamahan baginda samingkin djato hati pada barones, samantara kapertjahannja poen djadi samingkin besar. Traoesa dibilang lagi, bagimana Caroline poenja broentoeng: barangkali djoega permeisoeri sendiri belon pernah dapet koernia begitoe.
Sri Maha Radja Leopold II, sabagimana telah ternjata dari peroesahan di Conggo, ada saorang jang mengarti betoel perdjalanan mentjari oentoeng. Tapi barones poen tida boleh dikata ada koerang tjerdik, dalem hal memoepoet, dimana ada terpendam oewang, dan idoengnja tida koerang tadjam dalem hal menjioem baoe, dimana adanja soember kaoentoengan.
