— 332 —
Tapi Caroline ampir tida mendenger apa jang dibitjaraken.
„Akoe rasa, lebi baek kaoe lantas pergi tidoer. Mengapatah djoega kaoe misti paksa-paksa tenaga badan? Boleh djadi djika dapet poeles, kasehatanmoe terloepoet dari serangan penjakit."
Sri Maha Radja memang ada rasaken diri seperti tida bertenaga tjoekoep, aken tinggal berdoedoek di krosi. Dengen banjak soesa ia berbangkit, dan separoh mengglendot pada tangan barones, ia berkata:
„Kaoe benar sekali: barangkali memang ada lebi baek akoe rebahken badan. Mengasoh salamanja ada hal paling taroetama, aken orang toenggoe bantoeannja alam, boeat perbaeki ia poenja kasehatan."
Satoe djam kamoedian baginda soeda poeles. Tapi tidoernja tida ada sabagimana biasa: hawa demam bikin ia menggelisah, samantara tangannja ada panas.
Waktoe hari soeda djadi petang, barones poenja hati djadi keder, meliat si sakit. Boeroe-boeroe ia minta doktor dateng preksa ka'adahan baginda.
Tabib jang dipanggili, sigra djoega dateng dalem astana. Satelah menanjaken ini-itoe pada barones, ia berkata:
