— 331 —
tida soedanja akoe boelak-balik pikiran, boeat baeki nasibnja kaoe poenja anak, tapi akoe tida bisa dapeti laen djalan boeat bikin moelia pada marika, dari meninggali satoe kakajaban besar."
Habis bitjara Sri Maha Radja berdiam bebrapa sa'at lamanja. Matanja memandang ka loear, dimana pada tepi langit, ada kaliatan awan poeti jang mengandoeng goeroe, plahan plahan naek ka atas.
„Akoe merasa badan ada koerang senang," kata baginda sakoenjoeng-koenjoeng. „Akoe dapet sesak di oeloe-hati. Barangkali akoe bakal diserang demam."
Kaloe begitoe kaoe misti lantas rebahken diri di pembaringan," kata barones.
Sigra ia bangoen dari tempatnja berdoedoek, dan berdiri di samping baginda dengen hati merasa piloe.
„Apa tida baek akoe minta sadja doktor dateng preksa kasehatanmoe?"
„Tida, itoe sekarang belon perloe! Boleh djadi berobahnja badankoe ada lantaran hawa oedara: akoe kira bakal mendjadi pantja-roeba. Liat sadja, langit beroman begitoe roepa!"
Kamoedian baginda menoendjoek pada awan, jang berlajang-lajang diatas.
