— 329 —
„Bilanglah sadja teroes terang, kerna akoe tida biasa membadeh-badeh orang poenja pikiran."
„Kaloe tida ini doewa, barangkali akoe traoesa berpikiran begitoe berat," kata baginda, sambil menoendjoek pada satoe anak jang ada di pangkoean barones, kamoedian pada laen anak, jang lagi rebah diatas beloelang, berdjemoer di panasnja matahari.
Caroline manggoet.
„Betoel begitoe, tapi kaoe taoekah apa jang salamanja membikin akoe bermasgoel, bilah meliat pada iaorang?"
Sri Maha Radja tida bri djawaban. Malaenken matanja meliat pada itoe doewa anak jang masi ketjil, dengen penoeh kasian.
Caroline poen berdiam sakean lama seperti ada kalelap pikiran. Kamoedian laloe berkata dengen soeara sedih: „Ini anak-anak, iaorang tida mempoenja oentoeng begitoe bagoes. Marika tida boleh toeroeni nama ajahnja, hanja misti hidoep sadja seperti barang jang tida ka sana tida ka sini. Iaorang boekan teritoeng dalem golongan orang bangsawan, samantara kaloe misti hidoep dengen bertjampoeran sama rahajat negri, marika tentoe nanti rasa-
