— 11 —
„Tapi, apatah masi boleh diharep, ia nanti mendjadi semboe? Atawa, barang kali soeda dekat adjalnja?”
„Sabar, sabar . . . . .”
„Djangan bitjara pandjang, Leo! Djawab sadja: Apa kita masi boleh harep, ia nanti mendjadi semboe kombali? Hajo, hajo! bilang padakoe ! O, Leo, katahoeilah bagimana adanja dengen akoe sekarang, bagimana ingetankoe ampir mendjadi hilang sama sekali, dan . . . . . .”
„Sabar, sabar, dan tegoekenlah hatimoe! Salama manoesia masi ada poenja napas, sanantiasa kita masi boleh berharep . . .”
„Memang, aken tetapi itoe tjoema satoe omongan sadja, satoe bitjara jang boleh membikin orang djadi gila! Kaloe orang jang sakit poenja toeboe samingkin djadi lemah, matanja poenja sinar jang menandaken hidoep djadi samingkin lesoe dan boetak, nistjaja harepan itoe poen silam bersama-sama . . . . .”
Samantara itoe kadoewanja lantas berdiam.
Permeisoeri awasi soeaminja dengen mengembang aer di mata, kamoedian laloe berkata lagi:
„Mengapa kaoe berdiam, Leo?”
