— 108 —
„Akoe sekarang moelahi pertjaja jang kitaorang ada menoedjoe djalanan jang benar. Akoe soeda kirim ka Berlijn satoe penoelis soerat kabar, aken mendjalani satoe daja pada Bismarck. Kaloe sadja hal jang akoe atoer, dapet apa jang diniatken, nistjaja tida berselang satoe tahon lagi, akoe soeda bisa sampe pada itoe niat, jang sakean lama ada diliarep-harep.”
„Akoe harep sanget jang niatmoe nanti kadjadian,” kata prins sembari tertawa. „Dan sekarang, apatah masi ada halangan, aken kita koendjoengi Clèmence?”
„Sekarang memang soeda waktoenja,” kata baginda, „dan kabetoelan sekali kitaorang boleh ambil ini djalanan, hingga traoesa lamanja sapoeloeh minuut kita soeda bisa sampe di itoe villa.”
„Hei, akoe rasanja dapet mendenger soeara kandaran!” kata prins dengen soeara sedikit plahan.
„Kaoe poenja koeping itoe tida boleh dipertjaja, sobat! Boleh djadi kaoe ada mendenger menderoenja ombak, dan lantas sadja kaoe kira, ada laen soeara. Liat sadja, ini djalanan ada begini soenji dan begini ketjil, hingga dengen soesa sekali, baroe satoe kandaran bisa berdjalan di sini.
