— 107 —
boedi, soeka bertemoehan padakoe di ini tepi laoet.”
„Tapi, tentoe sekali orang nanti sampeken padanja, jang kitaorang telah bertemoe di sini.”
„Boleh djadi sekali! Tapi sekarang biarlah kitaorang bitjaraken sedikit, hal jang boleh menjenangken hati. Bagimanakah dengen Clémence?”
„Baek sekali! Dan kaloe kaoe soeka, akoe bisa trima kaoe sabagi tetamoe dalem roemahnja. Akoe soeda soeroe diriken boeat ia satoe villa, jang menoeroet betoel sabagimana akoe poenja kasenangan. Sabentar, kapan hari soeda djadi sedikit gelap, kitaorang boleh koendjoengi padanja. Akoe sanantiasa berhati-hati sekali, soepaja orang poenja lidah jang djahat, tida mendapet lantaran, aken kaloeari perkatahan jang koerang baek bagi akoe. Aken tetapi maski begitoe, toch di sana-sini soeda gemper orang bitjaraken ini perkara.”
Samantara itoe, kadoewanja laloe berdjalan lebi djaoe sembari beromong-omong.
„Habis, bagimanatah dengen itoe pekerdjahan di Afrika?” menanja Prins van Saksen-Coburg dengen sakoenjoeng-koenjoeng.
