— 105 —
sering kali terdjadi dengen tida menjinta lebi doeloe satoe sama laen. Lantaran ini mendjadi kitaorang tjari sadja di loear roemah, apa jang kita tida bisa dapet dalem astana sendiri.”
Baginda memanggoet, tapi sembari gojangken tangan, ia lantas berkata:
„Biarlah kitaorang djangan bitjaraken lagi tentang itoe perkara.”
„Begitoe memang ada paling baek! Tapi apa jang akoe maoe tjeritaken sekarang, adalah hal jang penting sekali bagi kita orang berdoewa.”
„Apa?”
„Louise salaloe ada oering-oeringan sadja, sabentar-bentar berlakoe tinggi sekali, dan sanantiasa adalah sabagi ia tida maoe ambil perdoeli padakoe. Lagi, ia tida sedikit maoe hargaken pada oewang, dan berboeat sadja seperti orang memboewang aer di solokan. Maski poen benar akoe bisa iringi sedikit-sedikit ia poenja kahendakan, tapi kaoe toch taoe, jang akoe sendiri masi bisa mempoenjaken laen-laen kaperloehan. Salaennja itoe kaloe maoe ditimbang dengen pikiran terang, harta sabagi akoe poenja, djoega tida nanti bisa toeroeti ia poenja kainginan sabrapa lama.”
