— 104 —
tempat jang soenji. Banjak orang, jang tinggal tida berdjaoehan dari sitoe, soeka goenaken temponja jang sempat dengen menjenangken hati di itoe tepi laoet. Saban-saban berada di pantei Ostende, adalah masing-masing sabagi merasaken, itoe angin jang sanantiasa menioep dengen santer, bisa bantoe menghilangken badan jang tjape, terdapet dari berkerdja berat.
Di masa ini tjerita terdjadi, djoestroe di itoe tempat permandian tida ada sabrapa banjak tetamoe, hingga dengen laloewasa mantoe dan mertoewa itoe bisa bitjara satoe sama laen. Dan soeara angin jang menderoeh-deroeh, membikin baginda tida merasaken ada halangan, aken bitjara sedikit njaring. Katanja:
„Hei, sobat, akoe misti bilang teroes terang, jang lantaran kaoe satori sama Louise, membikin ka'adahankoe dalem roemahtangga djadi koerang baek sekali.”
„Boleh djadi, tapi akoe tida bisa berlakoe laen dari apa jang akoe telah berboeat. Akoe sendiri tida mengarti, apa jang membikin Louise djadi begitoe. Lebi djaoe baek kitaorang troesa bitjaraken, kerna kaoe poen tentoe ada sampe taoe, jang nikahan kita, orang-orang bangsawan di fihak tinggi.
