— 49 —
Keizer tida berpikiran tetep, keadahan
djadi kaloet. Peng-tiong lempar
sendjata pergi ka goenoeng.
Orang jang lakoeken itoe pemboenoehan boekan laen dari Ong Thian-teng, jang sasoedanja ambil itoe tiga boetir kapala boeat dibawa sabagi boekti, sigra djoega ia berlaloe dari post Yong-kioe-ek, balik ka kota Radja.
Sasampenja di gedong Liap Djiang, orang kosen itoe lantas oendjoeki kapalanja si dorna jang dikoetoengken, dan tjeritaken satoe persatoe bagimana ia lakoeken itoe pemboenoehan dengen tida ada saorang jang mengatahoei.
"Tentang perdjalanannja Tjoa Keng berampat tida kasoesoel,” kata Ong Thian-teng kamoedian: "sataoe oppas pengiringnja ambil djalanan ka mana. Lantaran itoe tjoema dapet ini sadja“
"Boeat itoe ampat dorna jang laen, akoe nanti oeroes kaloe sasoedanja marika sampe di kota Tamtjioe,” kata itoe Hoe-ie: "Sekarang sasoedanja bisa singkiri ini jang tiga, katjilakaan jang bakal menimpa pada rahajat boleh diharep nanti banjak koerang."
