— 321 —
Tapi Pwe Soan jang denger itoe warta, lantas berkata:
„Pasoekan Kim ada terlaloe besar dan soeker boeat kita tempoer. Maski panglima-panglima di fihak kita ada tjoekoep kagagahan, tapi kaloe dibandingin dengen tenaganja balatentara, fihak kita boekan tandingannja.“
„Itoelah bener sekali,“ kata Tjoe Boe: „sabenernja, dengen naeknja Khong Ong di atas tachta, boekan ketjil menimboelken kita poenja kagoembirahan. Tapi siapa doega itoe djoengdjoengan ada berpikiran singkat, sagala dorna ada penoeh di saidarnja, hingga mantri-mantri jang pande, djoedjoer dan satia, djadi menjingkir djaoe. Lantaran itoe djoega, maka boeat kita djadi terpepat itoe djalan boeat kombali ka Tiauwteng. Samantara keadahan di ini goenoeng tida sabrapa santausa, maka perloe kita berichtiar laen djalan boeat kaslamatan.“
„Boeat dapetken perlindoengan jang santausa betoel, akoe soeda dapetken satoe tempat,“ begitoe An To-tjwan samboeng perkatahannja Tjoe Boe: „tempat itoe ada dilindoengken dengen tembok-tembok benteng bikinan alam jang tegoe, hingga tida koeatir dapet serangannja ratoesan laksa manoesia.“
„Di manatah tempat itoe?“ menanja laen-laen orang.
Pembalesan Kawanan Liangsan,
21
