— 322 —
„Tempat itoe boekan laen di poelo Kimgo,“ saoet An To-tjwan: loewasnja itoe poelo ada kira-kira limaratoes li, jang sekarang ada didoedoeki oleh Hoen-kang-liong Lie Tjhoen dengen brapa poeloe soedara-soedara angkatnja.
Lebi djaoe ini thabib tjeritaken satoe persatoe keadahannja itoe poelo, dimana ia soeda taoe berdiam doeapoeloe hari lamanja. Orang-orang gaga dari lemmatjwan jang baroe dateng di Teng-hoensan, memang tida taoe itoe perkara, maka itoe thabib moesti toetoerken kombali, sabagimana doeloe ia telah tjeritaken pada sabagian dari Heng-tenja. Kamoedian kasi pikiran, lebi baek pergi ka itoe poelo sadja, berkoempoel bersama-sama Lie Tjhoen.
Semoea Hohan merasa satoedjoe, tapi Jo Liem tanja: itoe tempat jang ada terpisa dengen laoetan besar, bagimana bisa disampeken, kaloe dengen zonder kapal. Sedeng boeat bikin kapal, tentoe tida kaboeroe.
„Kapal boekantah soeda sadia?“ kata Jan Tjeng: „apa soedara-soedara tida denger, jang itoe thaubak baroesan ada bilang, jang Ouw Oh-ma lagi asik membikin kapal-kapal perang. Maka akoe doega, bebrapa boea tentoe ada djoega jang soeda rampoeng boeat kita pake menjebrang ka Kimgo. Tjoema sadja akoe tida taoe bagimana keadahan di kota Tengtjioe.“
