— 320 —
kota terseboet, thaubak itoe membri taoe: sasampenja di itoe kota ia dapet kabar, bahoewa Ouw Oh-ma jang pergi mamereksa pembikinan kapalkapal perang di Tengtjioe, telah kombali. Satelah dapet taoe apa jang soeda terdjadi dengen perkara di kota Koensengkoan dan Tjeetjioe, tentang kamatiannja Goe Touwkam, Tjan Sie-hiong, dan Kwee Keng, itoe generaal Kim djadi amat goesar dan lantas sadja balik ka Tjeetjioe hoeat siapken 20.000 balatentara, jang tida lama aken menjerang ka mari.
„Hahaha! itoe baek! itoé baek!“ kata Wie Siauw-tjhit dengen girang: „kaloe brandal Kim itoe dateng tentoe akoe labrak, dan kamoedian kita lantas poekoel ka Tongking dan doedoekin kabesaran jang agoeng, apa itoe tida bagoes?“
Penoetoepnja itoe perkatahan, kombali ia tertawa gelak-gelak.
Meliat kalakoeannja Wie Siauw-tjhit jang begitoe, membikin orang djadi inget pada Lie Koei, jang saban-saban denger moesoe dateng, tentoe djadi girang dan tertawa besar. Ini doea orang poenja adat dan kalakoean, djika dibandingken pada itoe Lie Thi-goe, sedikit poen tida berbedah.
(Ada samboengannja.)
