— 247 —
-Koen Ko satelah dateng menghampirken dan liat roepanja itoe tiga tetamoe, laloe mengawasi sakoetika lama. Sataoe lantaran apa, achirnja ia merasa koeatir jang ini tiga orang nanti djadi tjilaka, maka boeroe-boeroe ia ambil obat pemoenah dan tjekokin itoe di moeloetnja masing-masing, hingga djongos jang tadi melajani dan rampas oewangnja itoe tetamoe, lantas menanja: kenapa tida diantepin sadja.
„Akoe liat ini orang ada berbedah dari orang- orang jang kabanjakan,” saoet Koen Ko:„maka baek djangan dibinasaken, kerna sajang kaloe orang jang moelia sampe djadi kenapa-kenapa.”
Selang sedikit waktoe Houw-jan Giok dan Tjhie Seng lantas bergerak, jang blakangan baroe ditoeroet oleh Song An-peng. Satoe persatoe lantas moenta dan jang pertama-tama bersoeara jalah Houw-jan Giok.
„Enak sekali,” kata itoe orang moeda, tapi matanja masi tinggal merem:„arak baek betoel!”
„Betoel arak baek,” saoet Tjhie Seng, jang roepanja soeda moelai inget:,,lantaran kabanjakan minoem sampe kita djadi poeles.”
Song An-peng djoega telah tersedar. Katiga orang itoe masi belon taoe apa jang terdjadi baroesan, hanja kira sadja jang dirinja kapoelesan lantaran kabanjakan minoem. Houw jan Giok dan Tjhie Seng lantas minta aer, sedeng Song An-peng pergi keloear meliat koedanja.
