— 246 —
lantas poelang ka kampoeng sendiri, dengen oesahaken pertanian. Blakangan waktoe Keizer dapet taoe djasanja Song Kang dengen sakalian Hengte-nja, maka Baginda laloe prenta orang diriken satoe klenteng di goenoeng Liangsan, dalem mana ada ditaro patoengnja 108 orang gaga jang ada berpahala pada negri.
Kang Tiong jang denger itoe kabar, berhoeboeng terbitnja hoeroe-hara jang blakangan, lantas dateng ka ini goenoeng dan tinggal teroes dalem klenteng terseboet, boeat merawat itoe gredja sebagi satoe padri, aken membales Song Kong-beng dan laen- laen Hohan jang doeloe hari telah oendjoek kabaekan padanja.
Sasoedanja tinggal sedikit waktoe, Kang Tiong koempoelken orang-orang penganggoeran, antara mana ada teritoeng djoega Koen Ko, jang kamoedian diprenta boeka satoe waroeng arak di moeloet djalanan Liketo, deket Liangsan, menoeroet toeladannja Tjoe Koei doeloe hari, aken goena serepin soedagar-soedagar jang liwat di itoe tempat. Bila orang-orang hartawan atawa soedagar besar jang mampir di sitoe, sigra djoega disoegoeken arak jang tertjampoer obat tidoer, hingga orang jang minoem itoe pasti aken djadi seperti mait.
Demikianlah telah terdjadi dengen Houw-jan Giok, Tjhie Seng dan Song An-peng.
Marika itoe masi terletak dengen tida inget orang.
