— 356 —
permintahan. Begitoelah sasoedanja membatja ilmoe, dalem itoe saat djoega lantas toeroen oedjan besar, jang disertaken dengen angin dan gledek, dan waktoe itoe pembesar minta dibrentiken, sigra djoega oedjan jang lagi toeroen sepenti ditoewang-toewang dan angin besar jang menderoe-deroe, djadi sirep.
Meliat begitoe, Liang-sih djadi girang dan lantas angkat ia mendjadi goeroe.
Kerna permintahan jang pertama soeda diloeloesken dengen terboekti, maka ilmoe boeat pindaken goenoeng atawa laoet, ia rasa tida perloe ditjoba lagi. Inilah ada beroentoeng boeat Kwe Keng, sebab kaloe Liang-sih minta ia boektiken itoe, tentoe ternjata jang itoe semoea tjoema omong sadja, kerna kasaktian begitoe Kwe Keng toeh tida ada poenja.
Demikianiah moelai dari itoe hari, Liang-sih peladjarken ilmoenja dengen radjin dan giat, sedeng itoe goeroe dipoedja betoel-betoel.
Boeat djadi tempat kadiamannja Kwe Keng, ada dikasiken satoe roema jang lengkap dengen perabot. Ampat orang boeat prenta-prentahan. Makan dan pake dibriken dengen satjoekoepnja, pendek boleh dikata tjoekoep senang.
Soepaja bisa lebi terpandang tinggi, Kwe Keng salaloe bitjara besar-besar, dan kata sagala ilmoe ia ada poenja. Djimat, moestika dan hikmad-hikmad jang moestadjeb poen tida koerang. Soepaja moeridnja djadi pertjaja, satoe kali Kwe Keng
