— 13 —
Halimoen di rawa Tjiokkiat-ouw jang soeda moelai boeiar, membikin pemandangan di itoe teaga djadi bagoes sekali kaliatannja. Aernja jang diliwati praoe djadi bergojang lantaran kena gerakannja dajoeng-dajoeng, hingga saban-saban di dalem aer kaliatan sinar mas jang berlegot seperti oelar. Jaitoe bajangannja penggajoe.
Itoe orang jang berada di praoe boekannja laen dari pada Siauw-tjhit bersama doea pengikoetnja. Djalannja kandaran aer ini ada menoedjoe kadjoeroesan Liangsan dengan ladjoe.
Sambil memandang kaindahannja alam Wie Siauw-tjhit tida merasa lagi jang praoenja telah masoek di moeara Kimshoa. Kaloe djalannja ini praoe ada begitoe tjepet, inilah tida heran, sebab orang jang mendajoeng, teroetama itoe Oah Giam Le sendiri, memang ada pande maen di aer.
Sigra djoega itoe praoe telah sampe katempat jang ditoedjoe, dimana orang-orang jang mendajoeng laloe brentiken penggajoenja. Dari tepi ini moeara Siauw-tjhit bertiga laloe naek ka-atas itoe goenoeng, jang sekarang soeda tida begitoe bagoes sabagimana doeloe masi ditinggalin oleh Song Kang dengen ia poenja saratoes delapan soedara angkat.
Di sapandjang itoe tempat telah djadi soenji. Apa jang kadengeran tjoema soearanja boeroeng dan binatang-binatang ketjil jang lagi bersaling
